11/07/2011

Бесмртник (Аеониум)

Aeonium (Аеониум) е род од фамилијата Crassulaceae, во кој има околу 35 различни видови на сукулентни суптропски растенија. Неговото име е изведено од старогрчкиот збор “aionos“, кој во превод значи “безвременски“, вечен“ или “бесмртен“.

Photobucket

Опис:
Растенијата од родот Aeonium се едни од најукрасните и најатрактивните сукуленти. Дури и оние кои не се љубители на сукуленти, кога ќе ги видат, не остануваат рамнодушни. Нивната привлечност се должи пред се на изгледот во форма на големи, шарени и жилави цветови.

Сукулентите од овој род имаат мазни атрактивни листови кои формираат розети на врвовите од стеблото или гранките. Во зависност од видот, тие можат да бидат ниско и високо растечки. Ниски се: Aeonium tabuliforme и Aeonium smithii, а во листата на високо-растечките видови се: Aeonium arboreum, Aeonium valverdense и Aeonium holochrysum.

Листовите на овие растенија може да бидат во широк спектар на бои: светло зелена, темно зелена и шарени комбинации. Некои видови имаат листови и во црвена, кафеава, виолетова или бронзена боја. Нивните бои најубаво се изразени во периодот кога тие се изложени на големо количество на сончева светлина, а особено доаѓаат до израз ако во тој период растат на отворено. Во зимските месеци кај најголем дел од видовите, листовите добиваат зеленкаста боја, но со доаѓањето на пролетта, нивната боја повторно се враќа.

Photobucket

Овој род на сукуленти е поврзан со родовите Sempervivum, Aichryson и Monanthes. Поврзаноста на растенијата од овие родови лесно се воочува, преку нивната сличност и сличноста на нивните цветови. Од неодамна родот Greenovia е ставен во родот Aeonium. Сукуленти од родот Aichryson многу често се продаваат како Aeonium-и. Поради сличниот изглед и сукулентите од родот Echeveria често се мешаат со сукулентите од родот Aeonium. Освен овие, има и други сукуленти во форма на розета кои наликуваат на нив, како што се Dudleyas, Graptopetalums, Pachyverias и Graptoverias.

Корењата на Aeonium-ите се прилично слаби и изгледаат како коса. Деловите во кои овие растенија ја складираат целокупната вода се стеблото и листовите. Кај многу Aeonium-и може да се забележат и воздушни корења. Тие се појавуваат кај растенијата кои имаат многу долго стебло, ако се превртени на земја или ако се во мала саксија.

Цветовите кои најчесто се во жолта боја, излегуваат од центарот на розетата. Кај некои видови цветовите се во бела, розева или црвена боја.

Photobucket

Одгледување:
Повеќето Aeonium-и најдобро растат во зимскиот период и периодот кога температурите се умерени. Со доаѓањето на летото многу од нив ги подвиткуваат листовите и преминуваат во фаза на мирување. Листовите се подвиткуваат како заштитна реакција, бидејќи жешкото сонце може да ги оштети, односно изгори. Доколку се одгледуваат во сенка и се полеваат редовно, најголемиот дел од сукулентите од овој род (не толку енергично, но) ќе продолжат да растат и во летниот период.

Некои видови од овој род се без стебло или имаат кратко стебло. Видовите кои растат високо, можат да достигнат и до 1,5 m. Разгранувањето се поттикува со добро полевање и прихранување. За да се направи едно растение да биде повеќе “грмушесто“, треба да се пресече главното стебло на посакуваната височина. Разгранувањето ќе почне да се случува за неколку недели. Резникот од врвот, може да се закорени (да се остави 2-3 недели на суво и топло место) и потоа да се засади, со што ќе се формира ново растение. Видовите кои се без стебло или имаат кратко стебло не треба да се подрежуваат.

Photobucket

Генерално, Aeonium-ите се умерено толерантни на суша и високи температури, а средно до слабо толерантни на мраз, односно смрзнување (при изложување на температури под 0 °C најголемиот дел од нив ќе се здобијат со оштетувања). Сите видови се зависни од светлина и директно сонце.

Повеќето Aeonium-и се monocarpic, односно нивните розети умираат по цветањето (откако семето ќе биде зрело). Спротивно од значењето на неговото име, за видовите кои не се разгрануваат тоа значи смрт за целото растение. Овие видови се размножуваат само од семе. Во тој контекст, цветањето кај некои од нив претставува спектакуларен завршен настан.

Photobucket

Потекло:
Поголемиот дел од видовите на овој род потекнуваат од Канарските острови. Некои видови може да се сретнат и во Мадеира, Мароко и источните делови на Африка.

Царство: Plantae
Ред: Saxifragales
Фамилија: Crassulaceae

Род: Aeonium

Видови:
*Видовите под кои има фотографија се детално обработени во КАКТИПЕДИЈА и може да ги отворите со кликнување врз нивното име или фотографија.

Aeonium aizoon
Aeonium appendiculatum
Aeonium arboreum
Photobucket

Aeonium aureum
Aeonium balsamiferum
Aeonium canariense
Aeonium castello-paivae
Aeonium ciliatum
Aeonium cuneatum
Aeonium davidbramwellii
Aeonium decorum
Aeonium glandulosum
Aeonium glutinosum
Aeonium gomerense
Aeonium goochiae
Aeonium haworthii
Aeonium hierrense
Aeonium holochrysum
Aeonium leucoblepharum
Aeonium lindleyi
Aeonium manriqueorum
Aeonium nobile
Aeonium sedifolium
Aeonium simsii
Aeonium smithii
Aeonium spathulatum
Aeonium tabuliforme
Aeonium undulatum
Aeonium urbicum
Aeonium valverdense

Надворешни линкови:
Wikipedia, Dave's Garden, Desert Tropicals, Glenhirst Cactus Nursery

No comments:

Post a Comment

Related Posts Plugin for WordPress, Blogger...