Супстрат

Супстратот, односно земјата за кактуси и сукуленти е малку потешка тема. Тоа е така бидејќи различни видови на кактуси и сукуленти бараат и различна содржина на супстратот. Во светот може да се купат и готови мешавини, но за жал кај нас не може да си приуштите такво задоволство или барем јас досега немам сретнато нешто слично низ цвеќарниците во Македонија.

Сепак за вистинските одгледувачи на кактуси далеку поголемо е задоволството доколку сами да си го подготвуваат супстратот. За целосно да се задоволат потребите на сите кактуси и сукуленти, треба да се направат многу различни супстрати, што не е ни малку практично. Одгледувачите најчесто тоа го решаваат со подготовка на еден “стандарден“ супстрат кој го користат за сите свои билки. Секој подготвен супстрат има свои, и добри и лоши страни. Можат да се најдат многу рецепти, но најважно е Вие да ја пронајдете Вашата формула, односно да направите мешавина која најмногу ќе им одговара на Вашите билки. Најбитно е супстратот да биде водопропустлив, односно исцедлив, бидејќи кактусите не сакаат “мокри нозе“.

Значи, експериментирајте...додавајте, одземајте и не заборавајте да ја запишете формулата! :-)

Пред да започнете со подготвка на Вашиот супстрат, еве неколку рецепти кои мислам дека можат да Ви бидат од корист:

Рецепт 1
1/4 земја од бавча
1/4 хумус
1/4 дробена цигла (максимум до 4-5 mm)
1/8 ситен речен песок
1/8 камчиња (2-5 mm)

Рецепт 2
1/4 ливадска иловица
сосема малку хумус (не повеќе од 2-3%)
1/2 крупен кварцен песок
1/4 стар супстрат

Некои одгледувачи во своите мешавини ставаат и морска пена, перлит, иситнет гранит и слични материјали. Супстратот кој јас во моментов го користам го подготвувам по следниот рецепт:

1/3 земја од бавча збогатна со арско ѓубриво
1/3 FLORAFIN-универзален супстрат, кој може да го најдете во цвеќарниците
1/6 песок со гранулација 2-3 mm
1/6 многу ситен песок (од речни наноси)
сосема малку дробена цигла (стара, полна цигла).

Доколку и Вие имате свој рецепт и сакате да го споделите...повелете, слободно можете да дадете Ваш придонес во збогатување на содржините во мојата КАКТУСАРНИЦА!