Проблемот на Александра

Пред десетина дена Александра Димоска ми го испрати овој маил...

Здраво, јас сум Александра, имам голем проблем со моите кактуси и би Ве замолила доколку можете да ми помогнете со совет.
Голем дел од кактусите почнаа да ми скапуваат, сите на ист начин скапувајќи од коренот нагоре. Во прилог испраќам некои слики да погледнете како изгледа.
Однапред Ви благодарам.

 

Проблемот на Алексдандра е навистина голем и затоа со нејзина дозвола го споделувам и со вас (заедно со фотографиите кои ми ги испрати), со цел (како што и таа кажа) да ви биде од корист и на вас доколку се соочите со ваков проблем или сличен на него.

Како и сите други билки и кактусите и сукулентите се подложни на болести, најчесто предизвикани од габички и вируси. Тие пред се, се развиваат во услови на зголемена влажност на земјата и воздухот. Основен предуслов за успешна борба со овие болести е нивното правовремено откривање.

Кај кактусите на Александра имаме случај на болест која предизвикува трулежно распаѓање на коренот и базниот дел. Оваа болест се шири многу брзо. Ако ја откриете кај вашите кактуси и сукуленти, треба веднаш да го отстраните болното, заедно со околно здраво ткиво. Билката потоа треба добро да се засуши, повторно да се засади и залее со раствор на Previkur или некој друг фунгицид.

Повеќе за болестите кои најчесто се јавуваат кај кактусите и другите сукуленти може да прочитате овде.

Благодарам Александра.

Календар за кактусари/ки: Јули

Во спарните денови (какви што ги имаме деновиве), освен на нас, прилично им е топло и на кактусите. Доколку ги чувате во затворен простор, треба почесто да проветрувате. Супстратот брзо се суши и затоа треба обилно да ги полевате и тоа навечер кога билките не се премногу загреани.

Доколку приметите дека растот на кактусите е успорен, тоа значи дека почнува периодот на летна стагнација. Во тој случај, внимателно со полевањето...во стагнација коренот не работи потполно и лесно може да угине. Во таква ситуација, трулежот (Болести) понекогаш се шири толку многу брзо, што не останува ништо од билката што би можело да се спаси.

Периодот на летна стагнација е време кога можете и да ги пресадувате кактусите и другите сукулентни билки!

Доколку сте посеале кактуси, младите билки се исто така во опасност. Во овој период почнува да делува трулежот на кореновиот врат. Најмногу се загрозени билките кои се посадени на хумусов супстрат. Кога ќе го приметите трулежот, веднаш треба да ги извадите сите билки од садот каде сте ги посеале, да ги оставите малку корењата да се засушат, а доколку постои можност можете да ги ставите неколку дена во ладилник на темепература од 3 до 4°C. Таквите билки, најдобро е да се остават незасадени се додека не залади.

Кога ноќите ќе станат поладни, растењето се обновува. На сите билки им годи кога неколку часа на нив ќе паѓа дожд, особено кога дожот е благ и топол. Силните дождови нема да им направат некој голема штета, освен што ќе ги испрска со земја и дел од неа ќе извади надвор од саксијата.

Извор: Gajenje kaktusa - Fleischer/Schütz

Календар за кактусари/ки: Мај

Во овој месец кактусите се во полна вегетација. Вегетационите врвови им се сјајни, кај секоја билка се појавуваат нови боцки, а кај многу од нив и цветови. Доколку некоја билка не расте, треба да го прегледате коренот.

Главна потешкотија во овој месец се честите заладувања. Во тие денови мора многу внимателно да ги полевате кактусите, за да не се случи во период на нагло заладување, супстратот да биде многу влажен. Во текот на тие неколку ладни денови и ноќи може да се случи, доколку има претерана влажност на супстратот да изгинат сите млади жили на коренот. Во тој случај билката ќе престане да расте се додека повторно не се обноват корењата, за што е потребно многу време. Секој ден добиен во текот на пролетта, во есен донесува поголем прираст.

Ова е период кога може да се пикираат младите билки израснати од семе. Кога времето е топло може да се изврши и калемење на млади и стари билки. Со оголед на тоа дека поради променливоста на времето ова е период кога можат да се јават болести, билките треба секојдневно да се контролираат и доколку се воочат знаци на габични болести, веднаш да се прскаат со фунгицид. Никогаш не треба да се прска во време кога билките се загреани од сонцето.

Извор: Gajenje kaktusa - Fleischer/Schütz

Болести

Кај кактусите и сукулентите се појавуваат неколку видови на болести кои се развиваат во одредени услови. Пред се, тоа се зголемена влажност на земјата и воздухот, како и поволни температури за развивање на болестите. Притоа габите најчесто ги напаѓаат физиолошки послабите билки, оштететни од физички повреди или од напад на инсекти. Поради тоа најдобро е да се спроведат соодветни превентивни мерки, кои пред се, се однесуваат на регулирање на влажноста и температурата. Доколку и покрај превентивните мерки дојде до појава на болести, треба да се интервенира со соодветен фунгицид.

Phytophtora omnivora предизвикува трулежно распаѓање на коренот и базниот дел на кактусот. Оваа болест се шири многу брзо. Кога ќе се примети, болното ткиво заедно со околното здраво ткиво се отстрануваат. Билката потоа треба добро да се засуши, повторно да се засади и залее со раствор Previkur.

Previkur-от е многу ефикасен и за многу габички од родовите Fusarium, Rythium и Rhizotonia, кои најчесто се јавуваат кај мали пикирани билки добиени од семе.

За превентивно полевање се користи раствор од 2,5ml на 1l вода. Доколку веќе дошло до појава на болести треба да се извршат две полевања во период од 3 до 4 дена. Со овој препарат корисно е да се врши превентивно полевање при пресадување на постари билки и задолжително при пикирање на млади билки израснати од семе. Освен овој особено ефикасен препарат, може да се користи Cineb во количина од 30 грама на 10l вода, како и Benomil во количина од 4 до 6 грама на 10l вода. Покрај тоа, овие два препарати, со оглед на тоа дека се во прашкаст облик, може да се измешаат директно во земјата (супстратот), што е интересно за постарите билки. Кај младите билки сепак далеку најсигурен е Previkur-от.

Покрај горенаведените болести, кај кактусите може да се сретне и сивото гниење - Botrytis cinerea. Симптомите се манифестираат во облик на сива покривка, која при допир лесно се претвора во прав. Во овој случај кактусите и другите сукуленти превентивно се третираат со Teldorom, Saprolom, Ronilan-FL или Sumilex 50–FL во концентрации препорачани во упатствтото за употреба.

Извор: CactusInfo